په اوکراین کې چارواکي وایي چې روسیې د سه شنبې په ورځ جون لسمه (جوزا۲۰) یې په مرکز کیف او اودیسه ښار باندې هوايي بریدونه کړي او لږ تر لږه درې کسان یې وژلي دي.
د اوکراین هوايي ځواک وايي چې په دغو بریدونو کې ۳۱۵ بې پیلوټه الوتکې [ډرونونه] او اوه میزایل کارول شوي دي.
د اودیسه د سیمې والي اولیه کیپر وویل چې روسیې دغلته کورونه او یو زېږنتون په نښه کړي دي.
د روسیې د دفاع وزارت وویل چې «د اوکراین هوايي چلند، میزایل، زغروال موټرونه او بېړۍ جوړوونکي تاسیسات» یې وېشتلي دي.
دغه وزارت همدغه راز ويلي دي چې د اوکراین ۱۰۰ بې پیلوټه الوتکي، چې په روسیې باندې د برید لپاره الوځول شوې وې، وېشتلې دي.
روسیې په اوکراین باندې لوی هوايي بریدونه پيل کړي او د دوشنبې په ورځ یې پرې د ۴۰۰ بې پيلوټه الوتکو بریدونه وکړل. دا جګړه داسې مهال روانه ده، چې د متحدو ایالتونو او ترکیې مشرانو په ګډون [د نورو هېوادونو مشرانو] دواړه هېوادونه هڅولي دي چې اوربند وکړي.
د اوکراین ولسمشر ولادیمیر زیلینسکي ویلي دي، چې د روسیې بریدونه د هغو خلکو په ضد دي چې روسیه د سولې لپاره هڅوي.
نوموړي په ایکس کې په خپل حساب کې لیکلي دي چې «د دغو بریدونو او د روسیې نورو بریدونو په اړه چپ پاتې کېدل ځواب نه دی، بلکې قوي اقدام» یې ځواب دی.
زیلینسکي لیکلي دي: «د متحدو ایالتونو اقدام، چې دا قوت لري چې روسیه سولې ته مجبوره کړي، د اروپايي ټولنې اقدام، چې پرته له دې چې قوي واوسي، بل انتخاب نه لري، په نړۍ کې د نورو اقدام، چې د دپلوماسۍ او جګړې د ختمولو غوښتنه کوي- او هغوی چې روسیې له پامه غورځولي دي.»
فورم \ دبحث خونه