په داسې حال کې چې چین په نیمه ختیځه کره کې خپل نفوذ زیاتوي، بیجینګ د سه شنبې په ورځ مۍ ۱۳ (ثور۲۳) د مرکزي امریکا او کارابین هېوادونو د ۳۰ مشرانو کوربه و.
د چین ولسمشر شي جینپینګ د لاتیني امریکا او کارابین د ټولنې غړو هېوادونو ته د نهو میلیارد ډالر مالي اعتبار وړاندیز وکړ.
نوموړي خپلې خبرې بیا تکرار کړې، چې هېوادونه دې د تعرفې لوړولو په اړه غور وکړي. هغه وویل: «د تعرفو لوړول او تجارتي جګړې هېڅ ګټونکی نه لري. سلطه یوازې د انزوا لامل کېږي.»
د هغه تر دغو څرګندونو یوه ورځ مخکې امریکايي او چینايي چارواکو د یو بل په توکو باندې د ۹۰ ورځو لپاره د تعرفو د کمولو خبر ورکړ. واشنګټن او بیجینګ دواړو دا وقفه خپله ګټه بللې ده.
چین د سه شنبې په ورځ له برازیل سره د تجارتي او سیاسي اړیکو د تقویې لپاره تقریبآ ۲۰ تړونونه لاسلیک کړل.
چین په وروستیو کلونو کې د نړۍ ډېرو هېوادونو ته پورونه ورکړي او لویې زیربنايي پروژې یې په کې پیل کړي دي. واشنګټن خبرداری ورکړی، چې د چین دا کار به دا هېوادونه د «پورونو لومې» کې ونښلوي او د اقتصادي پرمختګ لامل به یې نه شي.
فورم \ دبحث خونه